Ekkert lát er á morðöldunni sem hefur geisað í Cancun í Mexíkó. Ekki er langt síðan að DV skýrði frá því að 14 hefðu verið myrtir í borginni á aðeins 36 klukkstundum. Í síðustu viku fundust 5 lík í bíl. Enn hefur ekki tekist að bera kennsl á líkin.

Á síðasta ári voru 29.158 morð framin í Mexíkó og ef þróunin verður sú sama í ár og undanfarin ár má reikna með miklu fleiri morðum en á síðasta ári. Á fyrstu tveimur mánuðum ársins voru morðin 21 prósent fleiri en á sama tíma á síðasta ári.

Ástandið er mjög slæmt í Cancun en þar hafa minnst 118 verið myrtir það sem af er ári. Morðin í Cancun tengjast aðallega eiturlyfjaneytendum og þeim sem stunda viðskipti með eiturlyf. Ferðamannaiðnaðurinn er stór atvinnugrein í Cancun og óttast er að morðaldan muni fæla ferðamenn frá. Þróun mála þykir minna illþyrmilega á það sem gerðist í Acapulco sem var eitt sinn vinsæll ferðamannastaður en er nú einn þeirra staða í Mexíkó þar sem morðtíðnin er einna hæst.

Breski fréttamaðurinn Krishan Guru-Murthy var nýlega í Mexíkó að vinna að gerð fréttaþáttarins Dateline. Hann segir að yfirvöld reyni að fegra stöðuna og draga upp glansmynd af Cancun þrátt fyrir öll morðin. News.com.au hefur eftir honum að það sé eins og lögreglan vilji ekki að neinn uppgötvi að morð eru framin í borginni. Hann telur að stjórnmálamenn á svæðinu séu undir miklum þrýstingi og telji sig nauðbeygða til að leyna því hversu há morðtíðnin er til að ekki verði úr efnahagslegar hamfarir í ferðamannaiðnaðinum.