Þriðji maðurinn var handtekinn í skáksmyglsmálinu í fyrradag. Maðurinn, sem heitir Sigurður Kristinsson, var handtekinn við komu sína frá Spáni. Þetta staðfestir Grímur Grímsson,yfirmaður miðlægrar rannsóknardeildar lögreglunnar á höfuðborgarsvæðinu, í frétt Vísis nú í morgun.

Skáksmyglsmálið hófst þegar torkennilegur pakki var sendur til skrifstofu Skáksambands Íslands frá Spáni í byrjun árs. Reyndist pakkinn innihalda um 8 kg af fíkniefnum sem falin voru í skákvörum. Fljótlega voru tveir menn handteknir og settir í tveggja vikna gæsluvarðhald í tengslum við málið. Þar á meðal Hákon Örn Bergmann, líkt og DV greindi frá í vikunni. Annar mannanna var látinn laus úr gæsluvarðhaldi í vikunni.

Í vikunni greindi DV frá því að eiginkona Sigurðar, Sunna Elvíra Þorkelsdóttir, hefði fallið milli hæða á heimili þeirra í Malaga með þeim afleiðingum að hún þríhryggbrotnaði. Sigurður var upphaflega grunaður um að hafa átt þátt í slysinu og var handtekinn af lögreglu þar ytra og sat í gæsluvarðhaldi um tíma. Sigurður var þó fljótlega sleppt úr haldi og tjáði hann blaðamanni DV að rannsókn málsins væri lokið og hann hefði hvergi komið nærri.

„Það var ekkert brot heldur slys. Ég var ekki til staðar, því miður, þegar slysið varð en yfirvöld tóku sinn tíma í að staðfesta það,” segir Sigurður.

Sett var á fót söfnun fyrir sjúkraflugi Sunnu Elvíru til Íslands en kostnaðurinn við flugið var um 5,5 milljónir króna. Þeim fjármunum tókst að að safna hratt og vel og nú styttist í að Sunna Elvíra kæmist undir læknishendur hér á landi. Hún lamaðist frá brjósti við slysið og er óvíst um batahorfur hennar.