https://www.facebook.com/www.dv.is/videos/257525884949840/
Allir sakborningar í Guðmundar- og Geirfinnsmálum hafa verið sýknuð í Hæstaréttir. Dómurinn var kveðinn upp nú rétt í þessu í endurupptökumáli stærsta sakamáls á Íslandi, Guðmundar- og Geirfinnsmálum. Bæði verjendur og saksóknari kröfðust sýknu.
Guðmundur Einarsson hvarf í janúar 1974. Geirfinnur Einarsson hvarf í nóvember 1974. Ekki er vitað hvort þeir hafi þekkst eða yfirleitt vitað af tilvist hvors annars. Þeir hafa aldrei fundist.
Sævar Ciesielski og Erla Bolladóttir voru handtekin síðla árs 1975 vegna Póstsvikamálsins svokallaða. Þann 21. Desember hófust svo yfirheyrslur yfir Sævari vegna Guðmundar- og Geirfinnsmálsins. Fleiri blönduðust inn í málið, Kristján Viðar Viðarsson, Tryggvi Rúnar Leifsson, Albert Klahn Skaftason og Guðjón Skarphéðinsson. Alls sátu sexmenningarnir í 6.146 daga í einangrun á meðan málið var rannsakað. Málið var mikið í umræðunni á áttunda áratug síðustu aldar og kepptust dagblöð við að flytja fréttir af málinu. Rataði það inn á Alþingi og var mikill þrýstingur á lögreglu að leysa málið, var meðal annars fenginn þýskur lögreglumaður til landsins til að hjálpa til við að leysa málið, þ.e.a.s. fá ungmennin til að játa að hafa orðið Guðmundi og Geirfinni að bana.
Dómur féll upprunalega árið 1980 þar sem ungmennin voru fundin sek og dæmd til fangelsisvistar. Sævar í 17 ár, hann lauk afplánun í apríl 1984. Kristján Viðar í 16 ár, hann lauk afplánun í júní 1983. Tryggvi Rúnar var dæmdur í 13 ára fangelsi, honum var sleppt í desember 1981. Guðjón í 10 ára fangelsi, honum var sleppt í október 1981. Erla var dæmd í 3 ára fangelsi, sleppt í ágúst 1981. Albert Klahn var dæmdur í 1 árs fangelsi, honum var sleppt í mars 1981.
Síðan þá hefur verið löng vegferð að fá málið endurupptekið þar sem dæmt var út frá játningum án atvikalýsingu, játningar sem voru dregnar til baka. Í niðurstöðu starfshóps frá árinu 2013 um málið kom fram að það sé hafið yfir allan vafa að játningarnar voru óáreiðanlegar og beri þess merki að ungmennin hafi ekki ráðið við þrýsting rannsakenda sem hafi verið búnir að ákveða að ungmennin væru sek.
Sævar barðist lengi fyrir því að fá málið endurupptekið. Hann lést í júlí 2011.
Málflutningur hófst í Hæstarétti fyrir tveimur vikum og tók tvo daga. Í málflutningnum gerðu verjendur sakborninga alvarlegar athugasemdir við það harðræði sem sakborningar í málinu sættu. Eins og áður segir kröfðust verjendur allra sakborninga sem fengu heimild til endurupptöku á málinu, sem og settur saksóknari, sýknu í málinu.
