Guðjón Rúnar Sigurðsson birtir þessar myndir af fremur subbulegu salerni við tjaldstæði eitt hér á landi. Fyrir þá em ekki tjalda á svæðinu og hafa greitt fyrir það en eiga leið um svæðið kotar 500 krónur að nota salernið. Guðjón birti myndirnar og eftirfarandi texta í Facebook-hópnum Bakland ferðaþjónustunnar:

Þessi „glæsilega“ salernisaðstaða er í boði á tjaldstæði á ónefndum stað á Íslandi. Já og vinsamlega borgið 500 krónur fyrir afnot ef þið eigið leið framhjá og gistið ekki á svæðinu. Er þetta boðlegt? Ekkert virkt gæðaeftirlit á landsvísu?

Skömmu síðar hvarf færslan úr birtingu í hópnum. DV setti sig í samband við Guðjón og fékk staðfest að færslan hefði ekki horfið af hans völdum og hann stendur við orð sín. Guðjón segir:

„Hef þó óljósan grun um að síðunni sé stjórnað m.a. af þeim sem hagsmuna eiga að gæta innan ferðaþjónustunar. Þess vegna má bara fjalla um og birta það sem vel er gert, en ekki það sem er miður og gæti valdið skaða. Kalt mat frá mér er að íslensk ferðaþjónusta er að rotna innan frá vegna þess að ekki er tekið á þeim sem eru að valda skaða í greininni. Þetta sjáum við sem erum mikið í því að ferðast og nýta okkur þjónustuna.“