„Er búið að breyta stöðlunum í Miss World eða er hún bara uppfyllingarefni til að sýnast fyrir íslenska feministann?“ spyr hin þekkta fyrirsæta Ásdís Rán í snappi á IceQueen Snapchat og birtir mynd af Stefaníu Töru Þrastardóttur sem kosin var vinsælasta stúlkan í keppninni Ungfrú Ísland sem haldin var í Hörpu í gærkvöld. Ólafía Ósk Finnsdóttir hreppti titilinn Ungfrú Ísland.
Stefanía Tara Þrastardóttir er nokkuð þéttvaxnari en tíðkast hefur um keppendur í fegurðarsamkeppni á borð við þessa og er þátttaka hennar talin til marks um breytt viðhorf. Ljóst er að Ásdísi Rán er ekki að skapi að þéttvaxnar stúlkur taki þátt í fegurðarsamkeppni miðað við þessi ummæli sem hafa vakið nokkra athygli.
Stefanía var kjörin vinsælasta stúlkan í atkvæðagreiðslu áhorfenda en hún er sögð vera bæði falleg og skemmtileg. Stefanía er förðunarfræðingur en vinnur auk þess með börnum.
