„Ég held að öll þjóðin standi á öndinni“
„Ég held að öll þjóðin standi á öndinni,“ segir Valgerður Sverrisdóttir, sem var ráðherra bankamála þegar Búnaðarbankinn var seldur árið 2003. Hún horfði á blaðamannafundinn í Iðnó í beinni útsendingu, eins og aðrir landsmenn. Hún segir að þessar upplýsingar – að ekki hafi allt verið með felldu – hafi smátt og smátt verið að koma fram í dagsljósið. „Maður trúði því lengi vel að þetta hefðu verið eðlileg viðskipti. Maður hafði engar aðrar upplýsingar.
Hún bendir á að stjórnvöld hafi fengið alþjóðlegt fyrirtæki, HSBC, til að ráðleggja sér varðandi söluna. „Og við greiddum fúlgur fjár fyrir þær ráðleggingar. En þetta virðist ekkert hafa verið skoðað.“
Spurð hvort hún líti á afhjúpun rannsóknarnefndarinnar sem persónulegt áfall fyrir sig segir hún að það sé alltaf gott að vera vitur eftirá. Margt hafi greinilega farið úrskeiðis. Hún bendir á að einkavæðingarnefnd hafi verið sá aðili sem sá um framkvæmdina og hún hafi heyrt undir forsætisráðuneytið. Nefndin hafi ráðið þessa ráðgjafa.
Valgerður segir að að sumu leyti sé gott að þetta sé komið fram. Hún kallar eftir því að sambærileg rannsókn verði gerð á sölu Landsbankans.
Hún segir að þær fléttur sem átt hafi sér stað í tengslum við söluna séu vart fyrir venjulegt fólk að skilja. Hún segir málið lykta af markaðsmisnotkun. Einbeittur brotavilji virðist hafa ráðið ríkjum, enda hafi til að mynda verið gefnar út fréttatilkynningar sem voru beinlínis ósannar. „Kannski má segja að þetta líkist svolítið Al-Thani-málinu, sem kemur svo síðar. Þetta hafa verið æfingabúðir fyrir það mál held ég.“