Lögreglan hefur lokað svæðinu við birgðastöð Atlantsolíu við höfnina í Hafnarfirði. RÚV segir að skórinn sem fannst fyrr í kvöld, og í fyrstu var talið að hefði fundist nærri Kaldárseli, hafi fundist á svæðinu. Það er þó óstaðfest.

Skórinn sem fannst var að sögn að gerðinni Dr. Martens, en Birna Brjánsdóttir var klædd slíkum skó þegar hún týndist, aðfararnótt laugardags. Til hennar hefur ekkert spurst síðan, en fyrr í kvöld dró til tíðinda þegar svartur skór, með snjó undir sóla, fannst. Auð jörð var aðfararnótt laugardags. Því er alveg óstaðfest að um skóinn hennar sé að ræða.

Blaðamenn DV eru á vettvangi en lögreglan verst frétta. Nokkur viðbúnaður er á staðnum. Kafarar eru á svæðinu, sérsveitarmenn og að minnsta kosti þrír björgunarsveitarbílar, sumir með miklum ljósabúnaði.

Uppfært klukkan 02:46. Báðir skórnir fundust á svæðinu en ekki hefur verið staðfest að um skóna hennar Birnu sé að ræða. Lögregla og björgunarsveitir leita nú af sér allan grun á svæðinu. Birna er ófundin.