„Já góðan daginn. Við erum í smá klandri hérna“ […] „Það er mikið rok hérna, við erum að fjúka upp á land. Við erum stutt frá landi. Við reynum að henda út járni [akkeri], svo sjáum við til hvernig gengur með það.“

Þetta segir Geir Roger Benonisen skipstjóri á snurvoðarbátnum Kim Roger þegar hann óskaði eftir aðstoð þegar báturinn var að reka upp í kletta við Lófót í norður Noregi. Í myndskeiði hér fyrir neðan má heyra einstök radíósamskipti skipstjórann við björgunaraðila í janúar síðastliðnum. Norska ríkisútvarpið birti myndskeið frá björguninni í gær ásamt upptöku skipstjórann. Magnús Þór Hafsteinsson fjallar um þessa ótrúlegu björgun á Facebook-síðu sinni.

„Geir Roger Benonisen skipstjóri á Kim Roger er eitursvalur og rólegur í talstöðinni þó staðan sé vonlaus. Rétt á eftir kallar Bodö Radíó í Kim Roger og tilkynnir að þyrla sé farin í loftið og hún komi eftir 20 mínútur. Björgunarskip er líka á leiðinni og verður komið eftir hálftíma.“

Kafteinn Geir Roger svarar:

„Þú verður bara að fá þá til að gefa í eins og þeir geta, nú er stuttur tími til stefnu. Við keyrum á hliðarskrúfunum núna og reynum að halda okkur frá en ég veit ekki hvort það tekst.“

Það liðu aðeins nokkrar mínútur en þá var báturinn á hliðinni í briminu að sökkva. Tveir úr áhöfninni fóru í sjóinn og börðust fyrir lífi sínu þar í briminu. Það fór þó betur en á horfðist en allir fimm í áhöfn bátsins var bjargað um borð í þyrluna á síðustu stundu. Tókst að bjarga skipverjunum úr sjónum en þrír héldu sér í rekkverkið í flakinu og voru skömmu síðar hýfðir um borð í þyrluna. Voru skipverjanir nokkuð vel á sig komnir miðað við aðstæður og hlutu aðeins minniháttar meiðsli. Einu áhyggjurnar voru í raun að þeir hefðu innbyrt olíu sem flaut á yfirborðinu þegar þeir fóru í sjóinn.

Báturinn sökk en myndskeiðið er tekið um borð í þyrlunni rétt áður en flogið er með skipverjana fimm á sjúkrahús. Ákveðið var að birta myndskeiðið til að sína starf björgunarmanna og mikilvægi þeirra. Hafa björgunarmenn fengið mikið hrós enda tímaramminn þröngur til að koma sjómönnunum til bjargar. Hér má sjá fleiri myndskeið og myndir en fyrir neðan er birt upptaka og myndskeið frá björgun.