„Ég er búinn að vinna langt fram á nætur við að hjálpa þeim að skrá sig,“ segir einkaþjálfarinn Skúli Pálmason. Í gær, mánudag, byrjuðu hátt í þrjú þúsund íslenskar konur í ókeypis fjarþjálfunarátaki. Sjö konur af hverjum hundrað konum á aldrinum 18–40 ára skráðu sig til leiks, alls 3.700. Þegar DV ræddi við Skúla fyrir hádegi á mánudag höfðu um þúsund þeirra ekki brugðist við tölvupósti sem Skúli sendi út. Hann telur því að þátttakendur séu um 3.700 talsins, gróflega áætlað. Því er um að ræða eitthvert stærsta líkamsræktarátak sem einn einstaklingur hefur staðið fyrir.

Skúli hefur starfað sem einkaþjálfari í um sex ár, hefur ÍAK einkaþjálfarapróf og er lærður sjúkraþjálfari. Hann segist svo ánægður með þær móttökur sem hópeinkaþjálfunin Sterkar stelpur hefur fengið að hann hafi ákveðið að gefa til baka og halda ókeypis námskeið. Öllum var frjálst að skrá sig og fá þannig aðgang að ókeypis 12 vikna þjálfunarplani. Viðbrögðin létu ekki sá sér standa.

Skúli segir að um sé að ræða styrktaráætlun fyrir konur á aldrinum 18–40 ára. Vegleg verðlaun verða fyrir besta árangurinn en hann er ekki fólginn í þyngdartapi. Konurnar skila upplýsingum inn á vefsíðuna styrktarklubburinn.is um hversu mikið þær hafa bætt styrk sinn. Þá skiptir máli að vera virkur á samfélagsmiðlum og setja sér markmið. Í verðlaun er árskort í Reebok, mánuður í hópeinkaþjálfun, Reebok-skór, inneign í GÁP, fæðubótarefni, klipping og snyrtivörur. Því er til mikils að vinna.

Skúli viðurkennir að það sé mikil vinna fólgin í því að halda utan um skráningu um 3.000 þátttakenda en segist eiga von á því að úr álaginu dragi nú þegar keppnin er komin af stað. Skúli býður ýmist upp á prógramm fyrir þá þátttakendur sem eru byrjendur eða þá sem lengra eru komnir. Spurður hvað hann fái úr út þessu segist hann einfaldlega fá mikið út úr því að hjálpa fólki að ná árangri. Auk þess sé í þessu fólgin heilmikil auglýsing fyrir hann.