Rapparinn vinsæli er sonur fyrrverandi félagsmálaráðherra
Óhætt er að segja að það gusti af rapparanum Herra Hnetusmjöri. Lagið hans, Já, ég veit, hefur tröllriðið vinsældalistum landsins undanfarið. Á dögunum fylgdi hann vinsældum lagsins eftir með því að gefa út plötuna Kóp Boi. Á henni eru ellefu brakandi fersk lög sem hafa fallið vel í kramið. Herra Hnetusmjör heitir réttu nafni Árni Páll Árnason og er tuttugu og eins árs gamall.
Það sem færri vita er að faðir hans er Árni Magnússon, sem gegndi embætti félagsmálaráðherra fyrir hönd Framsóknarflokksins árin 2003–2006. Árni starfar í dag sem framkvæmdastjóri Orku hjá verkfræðistofunni Mannviti.
Árni stendur greinilega þétt á bak við rappferil sonarins því í fjórða lagi nýútkominnar plötu, sem ber heitið Lítur allt út fyrir það, segir Herra Hnetusmjör: „Pabbi sagði eltu drauminn og ég gerði hobbí mitt að vinnu“. Það hefur sonurinn svo sannarlega gert en í sama lagi kemur fram að hann taki 100 þúsund krónur fyrir að semja takt og 300 þúsund krónur fyrir að koma fram.
