Óskarsverðlaunahafinn Ben Affleck hefur lokið sinni þriðju áfengismeðferð og birtir yfirlýsingu þess efnis á Instagram-síðu sinni.
„Ég lauk fjörutíu daga áfengismeðferð í vikunni og er í eftirmeðferð,“ skrifar leikarinn. Hann þakkar sínum nánustu fyrir stuðninginn.
„Stuðningurinn sem ég hef fengið frá fjölskyldu minni, samstarfsfélögum og aðdáendum skiptir mig meira máli en orð fá lýst. Það hefur gefið mér styrk til að tala um veikindi mín við aðra. Baráttan við fíknina er eilíf og erfið barátta. Þess vegna er enginn í raun inn og úr meðferð. Þetta er lífstíðar skuldbinding. Ég berst fyrir sjálfan mig og fjölskyldu mína.“
View this post on Instagram
Þá segist hann einnig hafa fengið aragrúa af skilaboðum frá fólki í sömu stöðu og hann.
„Mikið af fólki hefur haft samband á samfélagsmiðlum og talað um þeirra eigin fíknisjúkdóm. Ég vil þakka þessu fólki fyrir. Styrkur ykkar veitir mér innblástur og styður mig á vegu sem ég hélt að væri ekki hægt. Það hjálpar mér að vita að ég er ekki einn. Ég þarf að minna mig á að ef maður er að glíma við vandamál þá er leit að hjálp merki um hugrekki, ekki veikleika eða galla. Með viðurkenningu og auðmýkt að vopni held ég áfram að hjálpa sjálfum mér með hjálp svo margra og ég er þakklátur þeim sem eru til staðar fyrir mig. Ég vona að ég geti einhvern tímann verið fyrirmynd þeirra sem í vanda eru staddir,“ skrifar leikarinn.
Ben fór í meðferð þann 22. ágúst síðastliðinn eftir að eiginkona hans, leikkonan Jennifer Garner, og svokallaður edrúþjálfari stóðu fyrir íhlutun í íbúð leikarans í Los Angeles. Nokkrum dögum áður hafði hann hætt með kærustu sinni, framleiðandanum Lindsay Shookus, eftir árs samband. Stuttu síðar sást hann spóka sig með Playboy-fyrirsætunni Shauna Sexton, sem er 24 árum yngri en hann.
Ben fór í meðferð árið 2001 og aftur snemma á síðasta ári. Hann sótti AA fundi eftir seinni áfengismeðferðina en loks náði Bakkus völdum á ný. Jennifer og Ben eru skilin að borði og sæng, en leikkonan vill ekki skilja við hann fyrr en hann nær að halda sér edrú í einhvern tíma svo hann geti deilt forræði yfir börnunum þeirra þremur; Violet, 12 ára, Seraphina, 9 ára og Samuel, 6 ára.
