Guðjón Sigmundsson, eða Gaui litli eins og hann er best þekktur, ræður ríkjum á Hernámssetrinu sem er að Hlöðum í Hvaðfjarðarsveit.

Á Hernámssetrinu er rakin einstök og merkileg saga hernáms á árunum 1940 til 1945, saga sem breytti friðsælli sveit í umgjörð heimsviðburða og skipti sköpum fyrir sigur bandamanna í síðari heimsstyrjöld.  Á safninu má finna vandað safn minja og minninga sem tengjast sögu hernáms í Hvalfirði á þessum örlagaríku umrótatímum.

Hernámssetrið rekur sögu hersetunnar og skipalestanna, sem lögðu upp í langa og erfiða siglingu frá bækistöðinni í Hvalfirði, og gefur innlendum og erlendum ferðamönnum kost á að kynna sér þessa sögu og arfleifð hennar.

Nýlega naut Gaui liðsinnis vina sinna og sótti fullt af nýju dóti til Reykjavíkur, sem mun njóta sín vel á safninu.

„Þessir vinir mínir Sveinn Hjörtur og Andy hjálpuðu mér að sækja til Reykjavíkur helling af dóti sem mun njóta sín vel á Hernámssetrinu. Andy var hermaður á Keflavíkurvelli hér í denn og hefur komið nokkrum sinnum til Íslands síðan hann hann hætti herþjónustu,“ segir Gaui í færslu á Facebooksíðu Hernámssetursins.

„Það er ómetanlegt að eiga þessa aðila að þegar mikið liggur við. Við fórum tvær ferðir til Reykjavíkur að sækja húsgögn og allskyns smádót, sem gerir Hernámssetrið enn fallegra og er sjón sögu ríkari. Að loknu góðu dagsverki fengum við okkur súpu og köku.“

Gaui hvetur alla til að koma og heimsækja safnið: „Er ekki kominn tími til að kynnast þessari stórmerku sögu okkar Íslendinga úr síðari heimsstyrjöldinni? Ég hvet alla að fá sér bíltúr um Hvalfjörð, koma í kaffi til okkar og skoða safnið, fara kannski í sund í leiðinni. Við á hernámssetrinu þökkum þeim félögum kjærlega fyrir hjálpina og hlökkum til að sjá ykkur á safninu.“

Facebooksíða Hernámssetursins.