Grínistinn Björn Bragi Arnarson segist hafa verið pínu óttasleginn þegar hann heimsótti íslenska landsliðið á hótel þeirra í gærkvöldi. Strákarnir í Mið-Íslandi mættu í óvænta heimsókn og héldu vel heppnað uppistand fyrir strákana.

Í viðtali við 433.is í gær, eftir uppistandið, sagði Björn að það hefði verið hálf óraunverulegt að sjá þá gífurlegu öryggisgæslu sem er við hótel íslenska liðsins í Rússlandi.

„Þetta er eitt það fyndnasta sem ég hef lent í. Þetta var eins og að vera í stríði. Við mættum og það voru sex gæjar með vélbyssur.“

„Við fengum að pissa áður en við komum inn á hótelið og það var bara einhver vöruskemma og einhver beddi á gólfinu og gæi með vélbyssu. Maður var pínu hræddur bara.“

„Þetta sýnir hversu stórt dæmi þetta er. Við þurftum að fara í vopnaleit og sprengjuleit á bílnum, gæinn var að tékka hvort við værum með bílsprengju,“ sagði Björn Bragi en allt gekk þetta þó vel.

Í viðtalinu, sem má sjá í heild sinni hér að neðan, kemur meðal annars fram að Björn og markvörðurinn Hannes Þór Halldórsson séu góðir vinir. Hannes varði vítaspyrnu frá Lionel Messi á laugardag og færa má rök fyrir því að hann hafi verið besti markvörður heimsmeistaramótsins til þessa. Björn sá það ekki alveg fyrir sér fyrir nokkrum árum.

,,Það var algjörlega súrréalískt. Ég táraðist í stúkunni, ég geri grín að honum og skýt á hann í þessu uppistandi áðan en maður var að springa úr stolti.“

,,Það fyndna er að þegar við vorum saman í Verzló svona 17 ára og vorum að gera 12:00 og svona, ég vissi ekki einu sinni að hann væri að æfa fótbolta.“

,,Hann var bara einn af þessum gæjum, ‘já ókei er þessi eitthvað í boltanum’, hann var á bekknum hjá Leikni og svo var hann eitthvað að hanga í þessu. Það er ekki séns að ég hefði séð hann fyrir mér fara á HM.“